Kkooti ejjulirwamu mu Kampala kyaddaki erangiridde munna NRM Peter Mugema amanyikiddwa ennyo nga Panadol ng’omubaka w’e Iganga Konsituwense.
Kinnajjukirwa mu kulonda kwa 2016, Mugema yawangula kyoka munna FDC Abed Nasser Mudyobole, nabiwakanya era yadukira mu kkooti enkulu e Jinja.
Kkooti enkulu e Jinja yasinzira ku bujjulizi obwaletebwa Abed Nasser Mudyobole nti Mugema, yatyobola amateeka g’ebyokulonda omuli ogulirira abalonzi ng’ayambibwako ssentebbe wa NRM e Iganga Yasin Ngobi era bwetyo kkooti yasazaamu Mugema, nelangirira Mudyobole nti ye mubaka omujjuvu eyalondebwa abalonzi Konsituwense y’e Iganga.
Mugema yadukira mu Kkooti ejjulirwamu era enkya ya leero, abalamuzi 3 nga bakulembeddwamu eyali amyuka ssaabalamuzi Steven Kavuma, Cheborion Barisaki ne Catherine Bamugemereire bawakanyiza ebyasalibwawo kkooti enkulu e Jinja.
Okusinzira ku kiwandiiko ekisomeddwa amyuka omuwandiisi wa kkooti Esther Nambayo, kkooti enkulu e Jinja yali terina buyinza okusazaamu obuwanguzi bwa Mugema.
Mungeri y’emu kkooti egambye nti, oludda oluwaabi lulemeddwa okumatiza kkooti, nti Mugema yenyigira mu gulirira abalonzi.
Kkooti erangiridde Mugema nti ye mubaka we Iganga Konsituwense omulonde ate eragidde Abed Nasser Mudyobole okusasula ensimbi zonna Mugame zasaasanyizza ng’ali mu kkooti.
