Kampuni y’amassimu eya MTN erangiridde olunnaku olw’enkya ku Lwokuna, 26, April, 2018 okukyaza bannabyamizannyo abaakiiridde Uganda mu mpaka za Commonwealth 2018 ezaayindidde mu kibuga Gold Coast ekya Australia wakati wa April 4 ne 15 ku kijjulo ekyenjawulo.
Okusinzira ku mwogezi wa MTN, Valery Okecho, Kampuni yabwe ebadde ewagira ekibiina ekitwala empaka z’okuduuka ekya Uganda Athletics Federation (UAF) emyaka 14 egyakayita omuli okusunsula n’okutendeka abazannyi era essaawa etuuse okujjaguza nabbo emiddala 6 egyawanguddwa.
Ate omu ku bakulira UAF, Timothy Masaba agambye nti betegese bulungi olunnaku olw’enkya okwetaba ku kijjulo kuba MTN ebadde ensale mu kutumbula eby’emizannyo n’okusingira ddala okuwagira abadusi.
Uganda yawangudde emidaali mukaaga okwabadde egya zaabu esatu egyawanguddwa abaddusi Joshua Cheptegei ne Stellah Chesang, feeza gumu ogwa Solomon Muntai n’egy’ekikomo ebiri egyawanguddwa omuddusi Mercelyne Chelangat n’omukubi w’ebikonde Juma Miiro. Emidaali gino gyayambye Uganda okumalira mu kifo ky’e 15 ku nsi 71 ezeetabye mu mizannyo gino.
Bannabyamizannyo ku lunnaku olwa Ssande bali mu maka g’obwa Pulezidenti Entebbe ate olunnaku olw’eggulo ku Lwokubiri babadde mu Palamenti y’eggwanga lino.
