Eyaliko Pulezidenti w’ekibiina kya Forum for Democratic Change (FDC) Dr Kizza Besigye atabukidde omukulembeze w’eggwanga lino Yoweri Kaguta Museveni okulemwa okugoba mukyala we Janet Kataaha Museveni ku bwa minisita w’ebyenjigiriza n’emizannyo mu ggwanga lino.
Besigye agamba nti kyewunyisa Museveni okutegeza eggwanga nti minisitule y’ebyenjigiriza n’emizannyo ejuddemu obuli bw’enguzi nga mukyala we amuli ku lusegere kyokka nalemwa okumugoba.
Besigye bw’abadde eyogerako eri bannamawulire e Kasangati enkya ya leero, agambye nti Museveni alemeddwa okulwanyisa obuli bw’enguzi kuba eremeddwa okukwata ku bantu be era y’emu ku nsonga lwaki ssente z’omuwi w’omusolo mpitirivu nnyo zibiddwa.
