Kkooti ya Buganda Road erangiridde nga 10, December, 2018 okutandiika okuwuliriza omusango oguvunaanibwa Dr Stella Nyanzi.
Nyanzi avunaanibwa okukozesa obubi omukutu gwa Facebook nawandiika ku mukulembeze w’eggwanga lino Yoweri Kaguta Museveni ebigambo ebikyamu.
Ne kumulundi guno, Nyanzi agaanye okusaba okweyimirirwa era omulamuzi Gladys Kamasanyu n’alagira bamuzeeyo ku limanda e Luzira kuba ab’oludda oluwaabi bakomekerezza okunoonyereza era baafunye obujjulizi bwona.
Dr Nyanzi avunaanibwa emisango omuli egy’okuvoola n’okutyoboola ekitiibwa kya Pulezidenti Museveni wamu ne nnyina eyava edda mu bulamu obweensi eno Esteri Kokundeka, ng’akozesa omutimbagano nga 16 September, 2018
Oludda oluwaabi lugamba nti ebigambo byo tebyakoma ku kuvvola Museveni wabula byamumalako emirembe.
Kinajjukirwa nti Dr Nyanzi yakwatibwa ku poliisi y’e Wandegeya gye yali agenze okusaba obukuumi nga yekalakaasa olwa bakulira yunivaasite y’e Makerere okugaana okumuzza ku mulimu gye.
Munnamateeka wa Dr Nyanzi, Isaac Ssemakadde agamba nti balina esuubi nti Pulezidenti Museveni agenda kuggya mu kkooti nga 10, December, 2018 okuwa obujjulizi n’okulumiriza omuntu we (Nyanzi).
