Bya Kyeyune Steven Mirembe
Gavumenti eyimirizza ekiragiro ekyabadde kiyisiddwa ab’ekitongole ekisolooza omusolo mu ggwanga lino ekya Uganda Revenue Authority (URA).
Ekiragiro kyabadde kirambika nti Bbanka zonna ziteekwa okuwaayo ebikwata ku akawunti z’abantu kuba kigenda kuyamba nnyo okunoonyereza abeepena omusolo.
Wabula okusinzira ku Minisita w’amawulire n’okulungamya eggwanga, Frank Kagyigyi Tumwebaze Gavumenti yayimiriza entekateeka eyo era ekitongola kya URA kiteekeddwa okolagana ne banka ku bantu abeepena omusolo okusinga okunyigiriza abantu bonna abeyambisa banka ezenjawulo.
Mungeri y’emu Tumwebaze agambye nti Kabineenti yawabuddwa Ssabawolereza wa Gavumenti nga y’emu ku nsonga lwaki bayimiriza ekiragiro ekyo.
Minisita Tumwebaze bw’abadde eyogerako eri bannamawulire ku Media Center mu Kampala agambye nti URA okugiwa ebikwata ku akawunti z’abantu eri buli Bbanka, kiyinza okusanyalaza ebyenfuna by’eggwanga olw’abantu okugyayo ssente zabwe n’okutya okuterekayo.
