Gavumenti ekubaganye empawa ku kunoonyereza kweriko mu buvuyo bwa banka enkulu nga Ssenkulu wa Bbanka enkulu Prof. Emmanuel Tumusiime Mutebile akaatiriza nga bbo bwebatamanyi kunoonyereza Poliisi kweriko, ng’era balinze ebinaava mu kunoonyereza kw’ekibinja kya Lt. Col. Edith Nakalema.
Ku Mmande, Omwogezi wa Poliisi mu ggwanga Afande Fred Enanga mu kwogerako eri bannamawulire ku kitebe kya Poliisi e Naguru, yagambye nti, Poliisi etandiise okunoonyereza ku bigambibwa nti abakulu mu bbanka enkulu bwe baagenda okukubisa ssente, baayongeramu ezaabwe ne bazireetera wamu ne ziri entongole era olwatuuka ku kisaawe e Ntebe ne bazibuzaawo.
Olunnaku olw’eggulo ku Lwokubiri, omwogezi wa Gavumenti Ofwono Opondo yasabye Enanga okwetonda ku bya banka enkulu. Opondo agamba tewali ssente zaakubibwa mu bukyaamu neziretebwa wano era Poliisi yonna erina okwetonda okuwa bannayuganda amawulire amakyamu.
Mu kiseera kino bannayuganda basobeddwa okuba tebamanyi ani mutuufu wakati wa Enanga, Opondo ne Mutebile
