Gravity Omutujju ali mu kutya, aba Battle Boyz bamuleetedde eggaali
Mu kisaawe ky’okuyimba, buli muntu ng’alina talenti, alina okuvaayo okulaga nti ddala Omutonzi yamuwa ekitone.
Uganda y’emu ku nsi ezirimu abayimbi abato, abalina amaloboozi amalungi, ennyimba kyokka olw’okubulwa abantu abayinza okubayambako, bangi balemeddwa okumanyika mu nsi yonna.
Olunnaku olwaleero, tukuleetedde abamu ku bayimbi abato, abayimba obulungi, balina ‘work’ era bagamba nti bagenda kukola kyonna ekisoboka, okumenya likodi mu ggwanga lino.
![](https://www.galaxyfm.co.ug/wp-content/uploads/2024/07/Pic-334.jpg)
Sozzi Brian nga kati ayitibwa Rickie Best DI VAMPIRE ng’ali ku siteegi, yazaalibwa1996 ku kyalo Kijjukizo mu disitulikiti y’e Lyantonde.
Wadde musajja muyimbi, yasomako ng’abayimbi abalala nga yatandikira ku Lyantonde Model Primary School, Kijjukizo PS ne P7 mu Kikondo PS e Kalisizo.
Oluvanyuma yagenda ku Masaka Sec School, St Bakali e Namasuba mu S6.
Rickie Best, yafuna Dipulooma mu Engineering okuva ku Yunivasite e Kyambogo.
Mu 2015, yasalawo okutandiika okutumbula talenti mu kuyimba era wakati mu kunoonya ssente okugenda mu situdiyo, yasobola okufulumya ennyimba omuli Katonda Yasalawo, Okolera, Tuyitewa n’ennyimba endala.
Mu 2023, Rickie Best yali ku Satellite Beach Mukono kwe kusanga munne Tembo Josham amanyikiddwa ng’omuyimbi Hard Water ng’ali ku siteegi.
Ng’abayimbi abato, bakaanya okuyimbira awamu era kati balina ekibiina ki Battle Boyz.
Nga Battle Boyz, basobodde okuyimba ennyimba eziri 20 era kati bagamba nti balina okumenyawo abayimbi omuli Gravity Omutujju, B2C n’abalala kuba tewali kubusabuusa kwonna bagamba nti balina talenti.
![](https://www.galaxyfm.co.ug/wp-content/uploads/2024/07/pic-443.jpg)
Hard Water yazaalibwa mu 1998 ku kyalo Njuule e Bubandi mu disitulikiti y’e Bundibugyo.
Yasomera ku Njuule Primary School, Kasese Secondary School, St Peter’s Sec School e Mukono gye yatuulira S6.
Mu 2018, naye yasalawo okwesoga ekisaawe ky’okuyimba. Yafulumya oluyimba olwasooka Tunyumirwe.
Yakola endala omuli Nyanza nazzako One in million n’endala.
Ebirala ebifa mu ggwanga – https://www.youtube.com/watch?v=NXkFQtqBtK0