Mercy Timbitwire myaka 38 eyalabikidde mu katambi ku mikutu gya Social Media ngakuba omusirikale wa Poliisi y’ebidduka owa Tulafiki mu kibangirizi kya Bannamakolero e Lugogo asindikiddwa ku alimanda e Luzira oluvannyuma lw’okuggulwako emisango.
Mu kkooti esookerwako e Nakwa mu maaso g’omulamuzi Erias Kakooza, Timbitwire asindikiddwa ku limanda okutuusa nga 4, November, 2024.
Mu kkooti ng’ali n’omukyala Abangira Bernardine, baguddwako emisango egy’enjawulo omuli
– Okukuba omusirikale
– Okubba amassimu 2 aga Smart Phone nga gali mitwalo 80
– Okubba ekyuma kya Poliisi aka EPS nga kiri mu bukadde 14.
Emisango emirala kuliko okuvuga emmotoka nga tekuli Third Party Insurance, okuvugisa ekimama, n’okulemwa okukolagana ne Poliisi.
Emisango gyonna baagyegaanye era omuwaabi wa Gavumenti Mariam Kruthum agamba nti okunoonyereza kuwedde nga balinze kkooti okusaawo olunnaku okuwuliriza emisango egyo.
Ate bannamateeka ba bakyala abo, Christopher Kajwara ne Eriakim Atumanya bawakanyiza emisango egiguddwa ku bantu baabwe.
Okunoonyereza kulaga nti nga 18, October, 2024, ku UMA e Nakwa, abavunaanibwa, babba essimu y’omusirikale wa Tulafiki Charles Makawa eri mitwalo 80 n’akuuma ka Tulafiki akali mu bukadde 14 oluvanyuma lw’okumukolako efujjo.
Kigambibwa Timbitwire yali ku ssimu ng’avuga emmotoka ekika kya Toyota Land Cruiser namba UBM 439T nga yali ku MUBS ku luguudo lwa New Port Bell.
Ebirala ebifa mu ggwanga – https://www.youtube.com/watch?v=OLMQ_FGwzwg
