Omuvubuka Nabugodi Emmanuel myaka 21, asimbiddwa mu kkooti esookerwako Entebe ku misango gy’okuvuma Pulezidenti Yoweri Kaguta Museveni ng’ayita ku mukutu ogwa Tik Tok.
Mu kkooti, mu maaso g’omulamuzi Stella Maris Amabilis, akkiriza emisango gy’okuvuma Pulezidenti Museveni myaka 80.
Ku Tik Tok, Nabugodi abadde asukkiridde okweyambisa ebigambo ebivvoola, ebiwemula Pulezidenti Museveni era agamba nti abadde akikola kunoonya “Likes”.
Oludda oluwaabi nga lukulembeddwamu Paul Aheebwa Byamukama lugamba nti Nabugodi yazza emisango mu September, 2024 mu disitulikiti y’e Wakiso oluvanyuma yaddukidde mu bitundu bye Mbale, gye yakwatiddwa.
Mu kkooti, Nabugodi yakkiriza emisango wabula Byamukama asabye omulamuzi okusiba Nabugodi emyaka 7 oba okutanzibwa 1.5M ku buli musango (ku misango 3), okutangira abalala okwenyigira mu bikolwa bye bimu.
Yaguddwako emisango omuli okutambuza ebigambo eby’obukyayi, okukozesa obubi Kompyuta n’okukozesa obubi emitimbagano.
Nabugodi yasindikiddwa ku limanda mu kkomera e Kigo okutuusa nga 18, November, 2024 era ku lunnaku olwo, omulamuzi agenda kumusalira ekibonerezo.
Ebirala ebifa mu ggwanga – https://www.youtube.com/watch?v=uPGPjpRbi28
