Ekiyongobero kibuutikidde abatuuze ku kyalo Naseeta mu ggoombolola y’e Kasangombe mu disitulikiti y’e Nakaseke, owa bodaboda bw’akubiddwa ennyondo ku mutwe era emutiddewo, Pikipiki ye ne bagitwala ku ssaawa nga 8 ez’amalya g’ekyemisana.
Andrew Katumba abadde avugira ku siteegi y’o Kayembe mu Tawuni Kanso e Wobulenzi attiddwa ne batwala Pikipiki ye namba UFB 701D.
James Peter Kibogga akwasaganya ebyokwerinda ku ba bodaboda mu kitundu ekyo, agamba nti omusajja apangisizza Katumba okumutwala e Nakaseke.
Agamba nti, nga wayise eddakika ntono, bategezeddwa nti Katumba attiddwa e Naseeta.
Katumba akubiddwa ennyondo ku mutwe okumpi n’enkoona ne bamusala obulago era omulambo gusangiddwa mu kitaba ky’omusaayi mu kasiko ebbali w’ekkubo.
Ssentebe akulira aba bodaboda mu kitundu ekyo, Joseph Lukaali awanjagidde ekitongole ekya Poliisi okunoonya abatemu olw’engeri omuntu waabwe gyatiddwamu.
Ate Isah Ssemwogerere, omwogezi wa Poliisi mu bitundu bya Savannah, agumizza abatuuze era agamba nti okunoonya abatemu kutandikiddewo.
Ate omubaka we Nakaseke eyamaserengeta Ssemakula Luttamaguzi, agamba nti Katumba ye muntu owokuna (4) okuttibwa mu ngeri y’emu, kwe kusaba ekitongole kya Poliisi okunoonya abatemu, abenyigidde mu kutta abantu baabwe.
Aate abasajja basatu (3) balwanidde omukyala, ekivuddeko omusajja omu okuttibwa, ng’afumitiddwa ekiso mu lubuto era afuuye omusaayi okutuusa lw’afudde.
Approx Akampurira ali mu gy’obukulu 30 nga mutuuze ku kyalo Kitumba mu disitulikiti y’e Kabale yattiddwa.
Okusinzira ku batuuze, ku ssaawa nga 3 ez’ekiro ekikeseza olwaleero ku Mmande, Akampurira afunye omukyala omu ku basamba ogw’ensimbi (malaaya) namutwala mu bbaala eya New California T & J bar Oasis Pub okulya obulamu.
Oluvanyuma lw’essaawa nga 2 ng’amugulidde eby’okulya ssaako n’eby’okunywa, Akampurira akutte omukyala ku mukono okumutwala mu loogi kyokka abadde yakasituka, abasajja babiri (2) ne bayingirawo okutwala omukyala y’omu nga bagamba nti mu bonna abasamba ogw’ensimbi, yasiinga okutegeera ensonga z’omu kisenge ate ng’alabika bulungi.
Embeera eyo, evuddeko okusika omuguwa era malaaya abadde asobeddwa kyokka amangu ddala abasajja okubadde Babu ne Jasper bafumise Akampurira ekyambe mu lubuto olw’okubalemesa okutwala omukyala.
Elly Maate, omwogezi wa Poliisi mu bitundu bye Kigezi, agamba nti abatemu baliira ku nsiko mu kiseera kino ku misango gy’okutta omuntu nga n’omulambo gwa Akampurira gutwaliddwa mu ddwaaliro ekkulu e Kabale okwekebejjebwa.
Ebirala ebifa mu ggwanga – https://www.facebook.com/GalaxyFm1002/videos/4368884189844506
