Poliisi y’ebidduka etandiise okunoonyereza ku kabenje ka Buloba Forest Park ku luguudo lwe Kampala – Mityana akasse abantu bataano (5) akawungeezi k’olunnaku olw’eggulo.
Okunoonyereza kulaga nti emmotoka ekika kya Scania namba UAX628S eyabadde etwala amazzi okuva e Kampala okutwalibwa e Mityana, yayabise ogumu ku mupiira, kwe kulemerera omugoba waayo.
Emmotoka yayingiridde emmotoka endala 5 okuli UBE613E Toyota Hiace, UAR 175W Isuzu Elf, UAX783F Mitsubishi Pajero ne UFL 384D Bajaj Boxer era abantu 5 bafiiriddewo.
Okusinzira ku mwogezi wa Poliisi y’ebidduka mu ggwanga Nampiima Faridah, abantu abaafiriddewo kuliko owa bodaboda, eyabadde mu mmotoka UAV 515J n’abalala 2 okuva mu mmotoka UBE 613E Toyota Hiace.
Nampiima agamba nti omuwendo gw’abantu abafa guyinza okweyongera kuba bangi batwaliddwa mu ddwaaliro e Mulago nga bali mu mbeera mbi.
Mu kiseera kino Poliisi eri mu kunoonyereza okuzuula ekituufu ekyavuddeko akabenje.
Ddereeva wa Scania yakwatiddwa akawungeezi k’olunnaku olw’eggulo oluvanyuma lw’akabenje.
Ebirala ebifa mu ggwanga – https://www.youtube.com/watch?v=84ybF4c3DWg
