Abasajja abalala babiri (2) baguddwako emisango gy’okwenyigira mu kutta abakyala abasukka 20 mu disitulikiti y’e Wakiso mu 2017.
Eric Ssegawa ne Ismail Nyanzi baasimbiddwa mu maaso g’omulamuzi wa kkooti enkulu Damalie Lwanga ku by’okutta Stella Nanfuka n’abalala.
Okusinzira ku ludda oluwaabi nga 24,May, 2017 Ssegawa ne Nyanzi be bamu ku benyigira mu mu kutta Nanfuka.
Ate nga 25, May,2017 benyigira mu kutta Regina Namuli nga baali ne Ibrahim Kaweesa, eyasindikiddwa e Luzira okusibwa okutuusa lwalifa lwa kutta bakyala abasukka 10 mu bitundu bye Ntebbe ne Nansana.
Omulamuzi Lwanga yayongezaayo omusango ogwo okutuusa nga 1, October, 2019, Kaweesa, Ssegawa ne Nyanzi lwe balina okudda mu kkooti okuwuliriza emisango gyabwe egy’okutta abakyala.
Okwongezaayo, kidiridde Kaweesa obutaba mu kkooti kuba yakaligiddwa obulamu bwe bwonna wadde y’omu ku bavunaanibwa.
Kigambibwa Kaweesa ne banne benyigira mu kusobya ku bakyala oluvanyuma ne battibwa, emirambo gyabwe ne gisuulibwa mu nsiko nga bagisonsese ebiti mu mbugo.
